Монгол Улсын Засгийн газрын 2009 оны 3 дугаар тогтоол

2009 оны 1 дүгээр                                                       Улаанбаатар хот

сарын  7-ны  өдөр                Дугаар 3              

                                                                          

                               Журам шинэчлэн батлах тухай

            Монгол Улсын Засгийн газрын тухай хуулийн 23 дугаар зүйлийн 3 дахь хэсгийг үндэслэн Монгол Улсын Засгийн газраас ТОГТООХ нь:

            1. “Монгол Улсын Засгийн газрын хуралдааны журам”-ыг хавсралтын ёсоор шинэчлэн баталсугай.

            2. Энэ тогтоол гарсантай холбогдуулан “Журам батлах тухай” Монгол Улсын Засгийн газрын 2000 оны 11 дүгээр сарын 17-ны өдрийн 178 дугаар тогтоолыг хүчингүй болсонд тооцсугай.

           

            Монгол Улсын Ерөнхий сайд                                                С.БАЯР  

            Монгол  Улсын  сайд,

            Засгийн газрын Хэрэг

            эрхлэх газрын  дарга                                                                    Б.ДОЛГОР

                                           Засгийн газрын 2009 оны 3 дугаар

           тогтоолын хавсралт

МОНГОЛ УЛСЫН ЗАСГИЙН ГАЗРЫН

ХУРАЛДААНЫ ЖУРАМ

Нэг. Нийтлэг үндэслэл

                                                 

            1.1. Засгийн газрын хуралдаан (цаашид “хуралдаан” гэнэ)-ыг хийхдээ Монгол Улсын Засгийн газрын тухай хууль болон энэхүү журмыг баримтална.

            1.2. Хуралдаан хууль дээдлэх, асуудлыг чөлөөтэй хэлэлцэж, цөөнхийн саналыг хүндэтгэн сонсож, олонхийн саналаар шийдвэрлэх зарчмыг удирдлага болгоно.

Хоёр. Хуралдааны тов, ирц

            2.1. Хуралдаан ээлжит болон ээлжит бус байна.

            2.2. Ээлжит хуралдаан долоо хоног бүрийн лхагва гарагийн 10.00 цагаас эхэлнэ.

            2.3. Ээлжит бус хуралдааныг Ерөнхий сайдын товлосноор буюу Тэргүүн шадар сайд эсхүл Засгийн газрын гишүүдийн гуравны нэгээс доошгүй нь санал болгосноор зарлан хуралдуулна.

           

            2.4. Хуралдааныг нээлттэй буюу хаалттай явуулахыг Ерөнхий сайд шийдвэрлэнэ. Хаалттай хуралдаанаар “төрийн нууцын жагсаалт”-д орсон болон Ерөнхий сайд хаалттай хуралдаанаар хэлэлцэх нь зүйтэй гэж үзсэн асуудлыг хэлэлцэнэ.

            2.5. Хаалттай хуралдаанд зөвхөн Засгийн газрын гишүүд, Засгийн газрын Хэрэг эрхлэх газар (цаашид “Хэрэг эрхлэх газар” гэнэ)-ын Тэргүүн дэд дарга, тухайн асуудлыг хариуцсан ажилтан оролцож, нууцын ажилтан тэмдэглэл хөтөлнө.

            2.6. Шаардлагатай гэж үзвэл аймаг, нийслэлийн Засаг дарга болон холбогдох бусад этгээдийг оролцуулан хуралдааныг өргөтгөсөн хэлбэрээр хийж болно.

            2.7. Засгийн газрын гишүүн хүндэтгэн үзэх шалтгаантайгаас бусад тохиолдолд хуралдаанд заавал оролцоно.

            Тайлбар: хүндэтгэн үзэх шалтгаанд өвчтэй байсан буюу өвчтэй хүн асарсан, эсхүл энэ журмын 2.8-д заасны дагуу гадаад буюу орон нутагт томилолтоор явсныг тооцно.

            2.8. Засгийн газрын гишүүн нэг хоногоос дээш хугацаагаар гадаад явбал Засгийн газраас, орон нутагт явбал Ерөнхий сайдаас тус тус зөвшөөрөл авч, очих газар болон холбоо барих хаягаа Хэрэг эрхлэх газарт мэдэгдэнэ.

            2.9. Хуралдааныг Засгийн газрын гишүүдийн гуравны хоёр нь оролцсоноор хүчинтэйд тооцно. Хуралдаанд Засгийн газрын гишүүд таслах (батлах) эрхтэй оролцоно.

                                                 

Гурав. Хуралдаанд оролцох (бусад) албан тушаалтан

            3.1. Хуралдаанд дор дурдсан албан тушаалтан заавал оролцоно:

            3.1.1. Хэрэг эрхлэх газрын Тэргүүн дэд дарга;

            3.1.2. Ерөнхий сайдын ахлах зөвлөх;

            3.1.3. Хэрэг эрхлэх газрын Хуулийн хэлтсийн дарга;

            3.1.4. Хэрэг эрхлэх газрын Зохион байгуулалтын хэлтсийн дарга;

            3.1.5. Засгийн газрын Хэвлэл мэдээллийн албаны дарга.

            3.2. Хуралдаанд дараахь албан тушаалтан дор дурдсан журмын дагуу зөвлөх эрхтэйгээр оролцоно:

            3.2.1. Засгийн газрын гишүүний эзгүйд дэд сайд;

            3.2.2. нийгэм, эдийн засгийг хөгжүүлэх Үндсэн чиглэл, төрийн мөнгөний бодлого, улсын нэгдсэн төсөв болон банк, санхүүгийн салбартай холбоотой асуудлыг хэлэлцэхэд Монгол банкны ерөнхийлөгч;

            3.2.3. улс, орон нутгийн төсвийн орлого, зарлагын гүйцэтгэл, төсвийн байгууллага, төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээд, төсвөөс санхүүгийн дэмжлэг авсан төсөл, хөтөлбөрийн санхүүгийн тайлан болон үйл ажиллагааны гүйцэтгэлийг хэлэлцэхэд Монгол Улсын Ерөнхий аудитор;

           

            3.2.4. статистикийн тооллого явуулах зохион байгуулалтын арга хэмжээ авах, статистикийн мэргэжлийн боловсон хүчин бэлтгэх, давтан сургах арга хэмжээ авах, албан ёсны статистикийн мэдээллийг боловсруулах хүчин чадлыг нэмэгдүүлэх болон гадаад орон, олон улсын байгууллагын шугамаар салбарын боловсон хүчний чадавхийг дээшлүүлэх чиглэлээр хэрэгжүүлж байгаа төсөлтэй холбоотой асуудлыг хэлэлцэхэд Үндэсний статистикийн хорооны дарга;

            3.2.5. санхүүгийн үйлчилгээтэй холбоотой асуудлыг хэлэлцэхэд Санхүүгийн зохицуулах хорооны дарга;

            3.2.6. харьяа нутаг дэвсгэрийнх нь эдийн засаг, нийгмийн хөгжлийн асуудлыг хэлэлцэхэд аймаг, нийслэлийн Засаг дарга.

            3.3. Хэрэг эрхлэх газар хуралдаанаар холбогдох асуудлыг нь хэлэлцэхэд энэ журмын 3.2-т заасан албан тушаалтанд хуралдааны тов, төлөвлөгөөг хүргэнэ.

           

            3.4. Хуралдаанд зөвлөх эрхтэй оролцох албан тушаалтны эзгүйд түүнийг төлөөлж оролцохгүй.

Дөрөв. Хуралдаанаар хэлэлцэх асуудал

            4.1. Хуралдаанаар Засгийн газрын тухай хууль болон бусад хуульд заасан Засгийн газрын бүрэн эрхэд хамаарах асуудал, Улсын Их Хурлаас даалгасан, Ерөнхийлөгчөөс санал болгосон асуудал хэлэлцэх бөгөөд түүний дотор дор дурдсан асуудлыг заавал хэлэлцэнэ:

            4.1.1. хуулийн төсөл;

4.1.2. хуульд өөрөөр заагаагүй бол Улсын Их Хуралд өргөн мэдүүлэх бусад шийдвэрийн төсөл;

4.1.3. Засгийн газарт чиглэл өгөх тухай Ерөнхийлөгчийн зарлигийн төсөл;

4.1.4. Засгийн газрын бодлогод өөрчлөлт оруулахаар Засгийн газрын гишүүнээс ирүүлсэн санал (төсөл);

4.1.5. Ерөнхий сайд дангаар шийдвэрлээгүй болон Засгийн газрын гишүүдээс эрхлэх асуудлаараа өөрсдөө тохиролцож чадаагүй саналын зөрүүг шийдвэрлэх асуудал.

            Саналын зөрүүтэй асуудлыг хуралдаанаар хэлэлцэхийн өмнө Ерөнхий сайд тухайн асуудлыг эрхэлсэн Засгийн газрын гишүүдийг байлцуулан байр суурийг нь тодотгосон байна;

            4.1.6. Засгийн газраас санаачлан боловсруулж Улсын Их Хуралд өргөн мэдүүлсэн хууль, Улсын Их Хурлын тогтоолын төсөлд хэлэлцүүлгийн шатанд оруулсан өөрчлөлттэй холбоотой асуудал;

            4.1.7. Улсын Их Хуралд өргөн мэдүүлсэн хууль, Улсын Их Хурлын тогтоолын төслийг эгүүлэн татах асуудал.

             

Тав. Хуралдаанд хэлэлцүүлэх асуудалд санал авах

            5.1. Хуралдаанаар хэлэлцүүлэх асуудлыг санаачилсан Засгийн газрын гишүүн уг асуудалд дор дурдсан журмын дагуу санал заавал авна:

            5.1.1. Сангийн яам болон Хууль зүй, дотоод хэргийн яам;

            5.1.2. хуралдаанаар хэлэлцэх асуудал, гарах шийдвэр нь тодорхой яамны бодлогын хүрээнд хамаарч байгаа бол уг яам;

            5.1.3. хууль, Улсын Их Хурлын тогтоолын төсөл болон нийтээр дагаж мөрдөх хэм хэмжээ тогтоосон шийдвэрийн төсөлд Хууль зүй, дотоод хэргийн яам. Хууль зүй, дотоод хэргийн яам санал өгөхдөө дараахь асуудлыг заавал тусгасан байна:

               a/ хууль тогтоомжийн төсөл нь Хууль, Улсын Их Хурлын бусад шийдвэрийн төсөл боловсруулах, өргөн мэдүүлэх журмын тухай хуульд заасан нийтлэг болон нэр томъёо, хэл зүйн бусад шаардлагыг хангаж байгаа эсэх;

               б/ нийтээр дагаж мөрдөх хэм хэмжээ тогтоосон шийдвэрийн төсөл хууль тогтоомжид нийцэж байгаа эсэх;

            5.1.4. төсөв, хөрөнгө, санхүү болон нэмэгдэл хөрөнгө шаардагдах асуудалд Сангийн яам. Сангийн яам санал өгөхдөө тухайн асуудлын нийгэм, эдийн засаг (улсын төсөв, хөрөнгө оруулалт, бизнес эрхлэгчид, бараа, бүтээгдэхүүний үнийн түвшин), байгаль орчинд үзүүлэх нөлөөллийн эдийн засгийн тооцоо, судалгааг заавал тусгасан байна;

            5.1.5. Засгийн газрын гишүүний гадаад томилолттой холбогдох асуудалд Гадаад харилцааны яам;

            5.1.6. эмэгтэйчүүд, хүүхэд, ахмад настан, хөгжлийн бэрхшээлтэй иргэдийн эрх, ашиг сонирхолтой холбоотой асуудалд Нийгмийн хамгаалал, хөдөлмөрийн яам;

            5.1.7. нийтээр дагаж мөрдөх хэм хэмжээ тогтоосон шийдвэрийн төсөлд уг шийдвэрээр ашиг сонирхол нь хөндөгдөж болохуйц иргэд, аж ахуйн нэгж, байгууллага. Ийнхүү санал авахдаа албан бичиг, хэвлэл, мэдээллийн хэрэгсэл, өөрийн байгууллагын веб хуудсаар дамжуулан бичгээр болон цахим хэлбэрээр авна.

            5.2. Засгийн газраас санаачлан боловсруулах хуулийн төслийг Хууль зүй, дотоод хэргийн яам эцэслэн хянаж, хуралдаанаар хэлэлцүүлэх зөвшөөрлийг өгнө.

            5.3. Хуралдаанаар хэлэлцүүлэх хуулийн төсөлд уг хуулийг хэрэгжүүлэхтэй холбогдуулан Засгийн газраас гарах шийдвэрийн төсөл, хэрэв хууль, Засгийн газрын тогтоолоор яам, агентлагт дүрэм, журам, заавар гаргахыг даалгахаар бол тэдгээрийн төслийг хавсаргасан байх бөгөөд яам болон агентлагаас батлах дүрэм, журам, зааврын төсөлд Засгийн газрын гишүүн санал өгөхгүй боловч хууль, Засгийн газрын шийдвэрийн төсөлд санал өгөхдөө тэдгээрийг харьцуулж үзнэ.

            5.4. Хуралдаанаар нэмэгдэл хөрөнгө гаргахтай холбоотой асуудлыг санаачлан хэлэлцүүлж байгаа Засгийн газрын гишүүн санхүүжүүлэх эх үүсвэрийг төсөлд тодорхой тусгана.

            5.5. Хуралдаанаар хэлэлцүүлэхээр боловсруулсан асуудалд холбогдох төрийн бус байгууллагын санал авах буюу хөндлөнгийн шинжээчийн дүгнэлт гаргуулж болно.

            5.6. Яам нь төслийг хүлээн авсан өдрөөс хойш ажлын    5 өдөрт багтаан санал өгнө. Төслийг санал авахаар явуулснаас хойш ажлын 10 хоногт багтаан санал ирүүлээгүй бол зарчмын өөр саналгүйд тооцно. Асуудлыг санаачлагч нь санал өгөх хугацааг заасан тохиолдолд түүнийг баримтална.

            5.7. Энэ журмын 9.4-т заасан тохиолдолд хуралдаанаар хэлэлцэх асуудал болон гарах шийдвэрийн төсөлд Засгийн газрын гишүүний саналыг бичгээр буюу факсаар, эсхүл цахим хэлбэрээр авч болно.

Зургаа. Хуралдаанд хэлэлцүүлэх асуудлыг Хэрэг

    эрхлэх газарт хүргүүлэх

            6.1. Хуралдаанд хэлэлцүүлэх асуудлыг хууль тогтоомжид нийцүүлэн зохих тооцоо, судалгаанд тулгуурлан үндэслэл сайтай боловсруулж холбогдох материалын хамт тухайн асуудлыг хэлэлцэхээс 7-гоос доошгүй өдрийн өмнө сайдын (түүний эзгүйд дэд сайдын) гарын үсэгтэй албан бичгээр Хэрэг эрхлэх газарт ирүүлнэ.

            6.2. Хуралдаанд танилцуулах мэдээлэл, сонсгол нь (Засгийн газрын үйл ажиллагааны хөтөлбөр, Үндсэн чиглэл, төсөв, гэрээ, хэлэлцээрээс бусад) 35 мөрөөр бичсэн        8 хуудаснаас, танилцуулга 4 хуудаснаас илүүгүй байна.

            6.3. Хуралдаанаар хэлэлцүүлэхээр ирүүлсэн материалыг хүлээж авахдаа Хэрэг эрхлэх газар дор дурдсан бүрдүүлэлтийг шалгаж үзнэ:

            6.3.1. энэ журмын 5.1-5.3, 6.2-т заасан шаардлагыг хангаж байгаа эсэх;

            6.3.2. төсөл, хөтөлбөрийн төсөлд түүнийг хэрэгжүүлэх төлөвлөгөөний төсөл (шаардлагатай тохиолдолд эрсдэлийн үнэлгээний хамт), хөрөнгө зардлын тооцоог хавсаргасан эсэх;

            6.3.3. материалыг хувилж олшруулах, архивын нэгж болгон хадгалах шаардлагын дагуу бэлтгэсэн эсэх;

            6.3.4. материалд холбогдох яам, агентлаг, аж ахуйн нэгж, байгууллага, иргэдээс ирүүлсэн санал болон тэдгээрийн товъёог.

            6.4. Хэрэг эрхлэх газар нь хуралдаанаар хэлэлцүүлэхээр ирүүлсэн асуудлын үндэслэл, тооцоо, судалгаа, уг шийдвэрийн төсөл нь тухайн асуудлаар өмнө нь гарсан шийдвэр болон хууль тогтоомжид нийцэж байгаа эсэхийг үзнэ. Хэрэв боловсруулалт нь шаардлага хангаагүй буюу хууль тогтоомж, Засгийн газрын бусад шийдвэртэй нийцээгүй, эсхүл зөрчилдсөн буюу давхардсан гэж үзвэл тодорхой үндэслэл, тайлбарыг гарган  материалыг буцаана.

6.5. Хуралдаанд хэлэлцүүлэхээр ирүүлсэн асуудлыг Хэрэг эрхлэх газарт хянан үзээд зохих хууль тогтоомж, бодлогод нийцүүлэх, найруулгын засвар хийх зэрэг өөрчлөлт оруулах шаардлагатай бол энэ тухай уг асуудлыг оруулсан Засгийн газрын гишүүнд танилцуулна.

Долоо. Хуралдааны бэлтгэл хангах

            7.1. Хуралдааны шийдвэрийн томъёоллыг тухайн асуудал оруулж байгаа Хэрэг эрхлэх газрын ажилтан хийж, хууль зүйн техникийн хувьд Хуулийн хэлтсээр хянуулна.

            7.2. Хэрэг эрхлэх газрын Тэргүүн дэд дарга хуралдаанд оруулах асуудлын төлөвлөгөө болон материалыг хянан үзээд Хэрэг эрхлэх газрын даргатай эцэслэн тохирсны дараа Ерөнхий сайдад танилцуулж хэлэлцэх асуудлын дарааллыг тогтооно.

            7.3. Хуралдаанаар хэлэлцэх асуудлын төлөвлөгөө гаргахдаа Засгийн газрын нэг гишүүний эрхлэх ажлын хүрээний асуудлыг хэлэлцэж дуусгаад дараагийн гишүүний эрхлэх ажлын хүрээний асуудлыг хэлэлцэх, ингэхдээ уг асуудлыг хэлэлцэхэд олон хүн оролцох, хугацаа шаардагдах улсын төсөв, Үндсэн чиглэл, хөтөлбөр, төлөвлөгөө зэрэг асуудлыг эхэлж оруулах зарчмыг баримтална.